Edrychwn ymlaen at yr Oedfa Foreol Gynnar (14/10 am 9:30 yn y Festri). Ein Hoedfa Ddiolchgarwch fydd hon. Byddwn yn casglu nwyddau i Oasis a Banc Bwyd Caerdydd.

Gweinir brecwast bach a nwyddau Masnach Deg yn y Festri rhwng y ddwy Oedfa Foreol.

‘Newyddion’ (Luc 6:24-25) fydd echel yr Oedfa Foreol (10:30) - Newyddion y Dydd a Newyddion ein Dydd, y naill ymhlyg yn y llall. Am wybod mwy? Dewch â chroeso. Ni fydd Ysgol Sul.

Liw nos, byddwn yn ymuno yng Ngŵyl Bregethu Eglwys Ebeneser (yn Eglwys Ganol y Ddinas, Windsor Place): pregethir gan Arwel Ellis Jones (Caernarfon). Sylwer ar yr amser: 17:30. Ni fydd Oedfa Hwyrol ym Minny Street.

Nos Lun (15/10; 19:30): ‘Cywyddaid’. Awr fach hamddenol yn y festri: defosiwn syml yn arwain at gyfle i ymdawelu ac ymlonyddu.

Cymdeithas Ddiwylliannol Eglwys Minny Street, (Nos Fawrth 16/10; 19:30 yn y Festri): "Benvenuti a Galles" yng nghwmni Robat Powell (yn y Festri).

Nos Fercher (17/10; 19:00-21:30) Panel Diogelwch Cydenwadol - sesiwn hyfforddiant i’n helpu i ddeall ein cyfrifoldebau tuag at blant ac oedolion bregus o fewn ein heglwysi.

Babimini bore Gwener (19/10; 9:45-11:15 yn y Festri): gwên, a chroeso, cwmni a phaned i’r rhieni; ac i’r plantos: hwyl a chân, chwarae a chwerthin. Gorffwysed bendith ar Fabimini. ‘Rydym yn ddyledus i’r rheini sy’n rhoi o’u hamser i gynnal y fenter bwysig hon.