Edrychwn ymlaen at yr Oedfa Foreol Gynnar (11/11 am 9:30 yn y Festri). Diolch i Marged ac Elinor am drefnu a chynnal y cyfan er ein budd a bendith.
Gweinir brecwast bach a nwyddau Masnach Deg yn y Festri rhwng y ddwy Oedfa Foreol.
‘Cofio’ fydd echel yr Oedfa Foreol (10:30). A oes diben i Sul y Cofio? A oes cyfiawnhad dros y fath Sul? Awgrym ein Gweinidog yw bod diben i’r Cofio, dim ond os ydym yn cofio cofio’r cyfan oll. Yr unig ffordd iachusol o gofio’r marw yw dagrau hallt o edifeirwch ar ruddiau’r byw a gweddi am drugaredd ac arweiniad Duw. Os ceir ar Sul y Cofio ymbil yn lle ymffrost, a gweddi yn lle llw, efallai y gall ein Duw ein hachub, ac achub ein gwleidyddiaeth a’n crefydda ar yr unfed awr ar ddeg.
Ni fydd Ysgol Sul.
Bydd cyfle i gyfrannu tuag at waith Coleg yr Annibynwyr yn ystod oedfaon y dydd.
Liw nos, (18:00) byddwn yn parhau i ystyried pwysigrwydd a phŵer Prydferthwch. Bydd Owain yn ceisio cyfuno Sul y Cofio a phrydferthwch, ac yn gymorth iddo yn hynny o gamp fydd John, Heinrich a Hedd Wyn. Am wybod rhagor? Dewch â chroeso. Byddwn yn falch iawn o’ch cwmni.
Gweddïwn am wenau Duw ar Oedfaon y Sul.
Methu dod i’r Oedfaon? Ymunwch â ni trwy gyfrwng negeseuon trydar @MinnyStreet #AddolwnEf Dechrau toc wedi 10:30/18:00.
Bydd ein Diaconiaid yn cwrdd nos Lun. Gofynnwn am arweiniad Duw wrth iddynt edrych a threfnu i’r dyfodol.
Cymdeithas Ddiwylliannol Eglwys Minny Street, (13/10; 19:30 yn y Festri): “Fy milltir sgwâr” yng nghwmni Helen Huws a Mary Hodges (yn y Festri)
Nos Fercher (14/10; 19:00-22:00) Noson Gymdeithasol yn Yr Hapus Dyrfa er budd Apêl Madagascar (manylion llawn yng nghyhoeddiadau’r Sul)
Babimini bore Gwener (16/11; 9:45-11:15 yn y Festri): gwên, a chroeso, cwmni a phaned i’r rhieni; ac i’r plantos: hwyl a chân, chwarae a chwerthin. Gorffwysed bendith ar Fabimini. ‘Rydym yn ddyledus i’r rheini sy’n rhoi o’u hamser i gynnal y fenter bwysig hon.
